應屆11位落選港姐喺無綫安排下，噚日到將軍澳電視廣播城試鏡，除咗李穎詩同周詠懿自動放棄試鏡機會之外，其餘落選佳麗都表示有興趣入娛樂圈。眾落選佳麗逐一以廣東話作分半至兩分鐘自我介紹，之後再喺鏡頭前行貓步。
大熱倒灶嘅徐淑敏話男友都支持佢入娛樂圈，問到有冇得到男友安慰？佢話：「佢有同我傾偈，有檢討過自己有乜嘢做得唔好，等自己可以再學習。我同佢講我最想做主持嘅工作，因為可以接觸多啲唔同類型嘅人，佢都好贊成。」
賽後檢討心翳住
問徐淑敏覺得今次落敗輸喺邊度時，佢就話輸在狀態唔好，之後又自爆話：「比賽嗰日一起身個心就翳住，以前從未試過咁，可能太緊張囉！」
另外，有報道話黃瑩比賽結束後出席慶功宴淚灑當場，唔忿氣輸畀被指隆胸嘅冠軍陳茵媺，黃瑩噚日即時否認有關報道，佢話：「我喊係同曾志偉傾開參選以嚟啲辛苦嘢，係感動到喊。」
