港股上周三破位而上，牛咗4日，終於再急升176點，恒指最高17473，收17451，兩個都係今年嘅新紀錄；期指更大升244點，收17462，轉為高水11點。
前日話過，大市呢個禮拜要再急升，強勢先可持續，家吓市勢對辦，恒指初步可向17800推進，調整一下（幅度不會大，估計會係400至500點），再次上衝，目標就係18300。
內地地產股強勢畢呈，全面報升，大紅籌如中國海外（688）、華潤置地（1109）同越秀投資（123）等，都有可觀進賬。中海係龍頭股，最近由4.50元起步，噚日已升上5.31元，升幅18%，今次升破下降軌後，下一個目標係4月中的高位6元水平。
越投終於發力，搶上1.49元後收1.47元，升5仙，成交更大增到1.1億股。越投有慢熱嘅特性，但在同類股揚長而去後，越投始會接力而上，而通常越投真正發力之時，都會急衝一段，升幅會好可觀。4月底5月初，越投就曾經威威，10日之內，由1.18元衝上1.95元，大升65%。
同中海比較，越投仲落後好遠。中海噚日收5.23元，同高位6.05元相比，低13.5%；越投1.47元同高位1.95元相比，低24.6%；追落後已有概念。仲有，越投市賬率低，而土儲豐厚，成本又平，保守嘅每股資產淨值高達3.34元，股價大折讓56%！
越投股價已重上3條平均線之上，而10日線亦已衝越20日同50日線，中期上升大浪確認，初步上升目標係1.95元，以1年為期，目標價係2.90元。近1個月來，全面看好內地地產股，希望可以食正呢個大浪。
預測PE僅8倍
上海置業（1207）個勢亦好強，收1.81元，升3仙，成交1500多萬股，全日最大沽家係滙豐證券。由5月開始，上海置業走勢形成一個大圓底，噚日成交大增3.2倍，已有突破之勢，照度上去，短期量度上升目標係2.20元。
上海置業05年（12月結）獲利3億元，每股盈利20仙；去年預售合共總值20億元的物業，將於06年入賬，估計盈利可上升至4.2億元，預測PE僅8倍，亦好吸引。
郭兆誠