美股帶住全球股市上升，恒指報高176點，計埋滙控（005）除息（唔係除淨）拖低嘅42點，個市實係升218點。
恒指已升破5月初17328高位，突咗123點。好多隻大藍籌，昨日未能以接近最高位收市。大市近期升得太急，再升恐怕水位有限，咪衝動撲落去高追C輪，要做嘢則揀啲P輪埋手。昨日推介嘅恒指P輪3865、H指P輪3690，細細注買入博大市回吐。
恒指熊證6214：恒指熊證6214昨收7.2仙，大散43%，死火榜上排第2，有99球（發行量都只係100球）易手。面世至今唔夠兩個月，已經縮水7成半有多。
隻輪12月尾夠鐘，行使價恒指17800，打靶價或回收價17500。行使價高過打靶價，隻證有R字（residue）跟尾，即係打完靶（「即將死亡」）後發行商會有少少渣畀番揸家。
6214昨日散得咁勁，皆因恒指最高17473，距打靶價只相差27點。只要觸及17500，跟住就算再跌，隻輪即刻完蛋。有冇興趣整番幾手？恒指如果回落二三百點，揸隻輪有機會賺5成至1倍，但恒指升多49點，就冇得再玩。
食得鹹魚抵得渴，食得羊肉唔怕羶。賭乜都係，想贏大錢，就要先準備輸大錢。
章盛