已經98高齡嘅邵逸夫爵士（六叔）上月因為患上肺炎同肺中有痰入院留醫，但六叔一出院竟然即刻去尖沙嘴半島酒店大堂coffeeshop，大擦朱古力蛋糕、pizza同雞翼，諗唔到佢對半島朱古力蛋糕念念不忘，大前日再食過，一於學鄭中基話齋：「食咗先至講啦。」
坐足兩粒鐘
當日下晝5點零鐘，六叔同太太方逸華（六嬸）、六嬸胞妹及四名親友，一齊到半島歎茶。身穿深藍色風褸同圍上紅頸巾嘅六叔坐喺較入嘅一枱，陰滋滋歎朱古力cake同飲熱茶，現場見佢精神甚佳，但坐喺身邊嘅就唔係同行嘅六嬸，而係一位着紅衫嘅中年短髮女子。
坐足兩粒幾鐘後，六叔同一眾親友齊齊撤退，短髮中女繼續傍實六叔，細心攙扶佢上勞斯萊斯房車，仲同佢同車離開，但六嬸就同細妹坐七人車走。
可能上次被本報獨家拍得六叔出院歎茶，呢日酒店明顯加強保安，六叔除由上次坐嘅開揚位轉坐隱蔽位外，附近又有保安氹氹轉巡邏，到六叔走時，四位酒店人員即刻護駕，仲嚟個人肉擋車阻止傳媒追訪，巴閉程度同保護政要有得揮。
