攞到德國埃特林根國際青少年鋼琴賽甲組冠軍嘅沈靖韜今日返到香港，教咗佢四年嘅演藝學院駐校鋼琴家黃懿倫噚晚話，佢呢位徒弟有三好：好有天份、好活、好精靈。靖韜有冇提過日後想做鋼琴家？黃教授話之前都有問過佢，佢一時答想，一時又話有啲驚練琴，不過𠵱家靖韜仲細，等佢慢慢諗啦，但要成功一定要靠自己定力同自律練琴。
靖韜呢次攞大獎，黃教授坦言有啲意外，因為甲組嘅參賽者年齡上限係15歲，佢只得10歲，好難同人爭。黃教授話唔驚靖韜會變得驕傲而怠於練習，「我一早同佢哋講，跟我學琴唔係為咗攞比賽第一。」
黃教授指出，彈琴最高境界係琴同人一體，透過琴音表達想講嘅事，琴聲就好似彈琴者用口說話咁，難道好高，「我都追求緊」，靖韜現時只係可以表達理念同情緒，仲未到最高境界。