有日網友Kiki屋企停電，搞到雪櫃啲食物變壞晒，仲發出臭味，佢已經徹底清潔過，又試過用市面上有售嗰啲雪櫃吸味劑，不過都始終仲係有啲味殘留咗喺度，諗咗好耐都唔知點算好，非常煩惱，佢將呢個問題Post上網，有班師奶就教咗佢一啲又平又易嘅辦法，話希望可以幫到佢咁話。
師奶1號阿和話：放未用過嘅茶包都可以吸味，亁亁爽爽又小巧，唔會整污糟個雪櫃。慳家啲嘅方法，係用飲用後嘅茶渣，都一樣有效。
師奶2號Meimei話：買個檸檬，將佢切開半個，再擺落雪櫃，一日後拎番出來，擺另外半個檸檬入雪櫃。定期每隔兩星期做一次，就包保以後再無異味。唔用檸檬，齋用橙皮都得，又可以廢物利用，幾環保！
師奶3號大吉話：電視教落，擺一卷紙巾在雪櫃，能夠除去異味，因為紙巾的纖維能夠吸走異味，一卷紙巾能夠用大約1個月左右，要定期換紙巾。算是師奶兵團中最有創意者。另外，佢自己個人經驗就話用咖啡渣都好有效喎，雪櫃仲會有陣陣咖啡香㖭！
記者：葉雪芯