今個周中以國際賽主打，歐洲國家盃外圍賽剛剛展開，應該睇定啲先下注；另外多場友賽，英格蘭、意大利同西班牙等孭飛球隊都有波打，不過講穩陣，由荷蘭名教頭軒廸克帶領嘅俄羅斯，主場對住「自家兄弟」拉脫維亞，博軒廸克新官上任三把火，主勝可望穩開。
文：牽牛
上個禮拜世界最大新聞，當然係英國警方成功粉碎恐怖分子自殺式炸飛機計劃，英國同美國航空交通大混亂，連帶歐洲「金魚缸」都大震倉；好彩香港夠硬淨，冇咩點跌市之餘，上個周五更加上番萬七點收市㖭！老套啲都係咁話，世界和平，大家先有餐安樂茶飯食，最理想梗係國與國之間有乜紛爭，不如搞場足球比賽，以波會友，化干戈為玉帛啦！
講番賭波正題，波友或者覺得國際賽好難賭，戰果暴冷暴熱，好多時都損手離場；其實賭友賽，最重要搞清楚一個概念：戰意。
無錯，意大利、英格蘭及西班牙等國家隊好手如雲，不過佢哋粒粒皆星，喺本身球會搵錢已經夠過世，對無關痛癢嘅國家隊「太公波」，又點會上心？而且呢幾個國家嘅本土聯賽未開波，狀態係點都冇人知，所以捧唔過。
論戰意，俄羅斯就唔使懷疑。俄羅斯呢個歐洲大國，近幾年戰績麻麻，不過見佢哋未踢完世界盃，已經搵定荷蘭籍教練軒廸克執教，證明佢哋有心搞番好支國家隊。軒廸克係筆者少數心悅誠服嘅教頭，連澳洲、南韓呢啲世界二、三線國家，都可以殺入世界盃次圈，證明佢嘅功力；俄羅斯近年唔係冇人才，不過最大問題係紀律，對國家隊賽事唔上心，又經常因為獎金問題搞內訌。
拉脫維亞變番魚腩
軒廸克出名軍紀嚴明，又擅長用體力化的壓迫打法，令人不期然想起80年代蘇聯嘅打法都好機動，亦都喺86年世界盃、同88年歐國盃有好成績；如果俄羅斯班球員配合到軒廸克戰術，真係有機會重建番20年前嘅「鐵幕紅軍」，咁就可以一路追落去！
睇番軒廸克今次點兵，大部份係俄國土炮，以三支俄超勁旅中央陸軍、辛尼特同火車頭為骨幹，名氣講真就真係唔大，不過勝在已經上晒力，原因係俄超聯𠵱家打到季中，球員狀態十足；再睇呢次搵嚟拉脫維亞拍跳，講真呢支從蘇聯解體後獨立嘅小國，只喺04年歐國盃曇花一現過，之後已經變番魚腩；俄羅斯呢次目標咁明顯，擺明大佬打細佬，賀一賀軒廸克新官上任，主勝只得1.35倍，係就係熱啲，不過勝在穩陣。
捧挪威「主勝」打老虎
冷門之選博巴西作客贏唔到挪威；巴西由新帥鄧加帶隊，原本都應該有期望，不過今次友賽選人就真係「揸流攤」，細哨、卡卡同阿祖全部都冇份，叫做孭飛嘅係羅賓奴、施仙奴同費特等第二梯隊，而且巴西友賽一向唔認真，就係人都知。挪威呢類北歐球隊，球員勝在向心力強，代表國家隊踢友賽，都當老虎咁打，而且仲有曼聯前鋒蘇斯克查復出，捧讓球主客和「主勝」，當受讓半球咁賭。
投資特攻隊金句
軒廸克出名軍紀嚴明；如果俄羅斯班球員配合到，有機會重建番20年前嘅「鐵幕紅軍」，可以一路追落去。