「條車胎突然爆咗，跟住失控成架車反埋，驚都嚟唔切就已經暈咗。」20年前，貨櫃車主聯會副主席黃贊坤於駕駛載滿貨物的貨櫃車駛至調景嶺時，爆胎失控，幸而大難不死，只入院一星期，但此後每次出車前都會小心檢查車胎，亦不敢超速行駛。
黃贊坤解釋，輪胎輾過尖石、鐵釘、三角鐵等硬物，均可能隨時爆胎，毫無先兆，「輕則失控，重則反車，頭胎失控會較嚴重，車速太快嘅話係無得救！」他表示，為免意外波及無辜，通常避免行中線。
右邊爆胎 扭左邊軚
香港貨櫃車教師工會主席林駒說，貨櫃車爆胎後會嚴重失控，極為危險，而「扭反軚」是唯一可以「救車」的方法，「譬如右邊車胎爆，架車就會側去右邊，呢個時候就要將軚盤盡快扭向左邊。」但他同時指出，車速若超過每小時60公里，便「欲救無從」。
他亦聽聞某些「蠱惑」車房幫貨櫃車主驗車時，以「道具」輪胎代替，通過測試後再換回原來輪胎，但有關情況未算嚴重。另外，據警方數字顯示，今年首半年涉及大、中型貨櫃車的意外有490宗，情況與去年相若。