無綫節目《美女廚房》自播出以來大受歡迎，收視成績理想，除三位主持鄭中基、梁漢文、方力申外，連粗眉兼哨牙的周中師傅，也憑着其抵死得戚的風格而人氣急升，最近就有不少網友在網上討論區留言談論其金句，對他經常在節目內搞gag，以及天生的一對粗眉，尤為欣賞。
日前卸下大廚裝束的周中師傅，以一身T恤、牛仔褲打扮在油麻地接受訪問，表情豐富的他盡顯搞笑本色，難怪在節目中搶了一班年輕藝人的風頭。
有色自然有慾
入廚40多年的周師傅表示以往在工作時朝夕相對的盡是男人，《美女廚房》就將美女與烹飪集於節目當中，是令節目大受歡迎的主要元素，他說：「食色性也吖嘛，有色就有慾啦，我哋喺廚房揸鑊鏟搵食梗係要真功夫，性感靚女煮得唔好食都吞埋去啦！」
對於在《美女廚房》節目中，經常自爆生鬼風趣的金句而獲網友在網上討論區（www.discuss.com.hk）爭相激賞，有網友更留言會因為他而中gag毒笑死（詳見附表），周師傅自謙地說：「我唔識玩電腦，唔知人哋對我有乜評語，我淨係覺得自己雙眉太粗，好似好惡咁，我講嘢都唔係好搞笑啫。」
Amanda手勢一流
問到在節目中廚藝最好的女藝人是誰時，周師傳毫不猶豫地選了曾在節目中向他獻吻的AmandaStrang，他說：「唔係因為俾佢咀過而揀佢，佢煮嘅意大利粉真係幾好食，雖然大家話鹹咗啲，但啲食物凍而鹹咗係正常嘅，平時睇報道話佢好放，呢啲我唔知啦，不過佢喺嗰集裏面好表現出自己嘅真個性，唔會爭風頭，其他女藝人太誇張啦。」
要揀廚藝最差的女藝人，師傅就表示非煮蔗蝦的官恩娜莫屬，他說：「佢煮得真係好難食，我都真係有食落肚，根本佢煮完嘅豬肉仲係生㗎，豬肉唔熟會死人㗎，煮熟啲食物係最基本嘅要求。」
現在過着半退休生活的周師傅，生活較悠閒，他說：「𠵱家係無業遊民，兩個仔又大啦，都出嚟做嘢。我通常每個月有一個禮拜飛去日本做嘢，所以唔係每集《美女廚房》都係由我做。」
老婆才是大廚
周師傅慨歎時下大部份女性都入不得廚房，又大讚妻子才是真正的大廚，他說：「啲女藝人喺節目中煮嘅嘢真係大部份都難食，但又難怪嘅，好多都係處女下海，𠵱家啲女人真係愈嚟愈少入廚房，怕煮之餘又怕收拾廚房個殘局，最難頂係佢哋連放晒啲材料落去煲湯都唔識，仲問點煲！我喺屋企唔會煮，梗係食番屋企個大廚煮嘅菜啦！」
採訪：卓美娟 攝影：陳慧安