巴塞隆拿今夏為「錢」途而奔波，到前日終於完成為期兩個幾禮拜嘅美洲之旅，返到西班牙。不過球員無得點唞，又要準備兩回合西班牙超級盃、對拜仁慕尼黑嘅友賽同埋月底對西維爾嘅歐洲超霸盃……，計計數，佢哋由7月底至今個月28號踢聯賽開「咧」戰，其間唔夠一個月總共踢十場波，真係鐵人都死。
由於巴塞近兩個夏天起勢出差，喺外地嘅號召力大增；據講，球會主要贊助商可能會提高一倍贊助費，去到每年3,000萬歐元（約2.9億港元）。辛苦有回報，但亦有代價。
回國日半即復操
話說巴塞隆拿大軍前日由美國搭完8個鐘飛機，飛越6,154公里後，終於返到西班牙。教練列卡特都算「皇恩浩蕩」，俾班球員休息一日半，但到禮拜二又即刻復操，仲要係一操操兩課，務求以最佳狀態喺禮拜四同愛斯賓奴踢超級盃首回合比賽。雖則話巴塞之前踢嘅係表演賽，而且場場陣容幾乎都唔同，但好似對瓜達拉哈拉（和1:1）、對阿美利加（和4:4）都踢得賣力，你話體力完全無消耗就勢係假。
更慘係嚟緊場場硬仗，仲有個別主將周中要為所屬國家服役，球季未開，巴塞躉應該開始擔心球員未開季已踢殘晒。
「巴塞隆拿搵錢要緊，但世界盃年球員本來已經唞唔夠，季前頻密賽序更加令球員透不過氣。話晒死敵皇馬今季實力大增，假如巴塞調整唔到，因住風水輪流轉喎。」