話說肥蜘蛛俠阿Matt早前玩阿煲呔，為咗條一借冇還、最後死埋嘅Democracy日本錦鯉，入稟小額錢債法庭，要求煲呔賠五萬大元。呢單民主錦鯉案，已經排期喺下個月13日早上9點開審，由於小額庭唔准用律師代表當事人，八方好奇問律政司司長黃仁龍會唔會畀煲呔親自上堂，以示法律面前，人人平等。
有關人士嘅回應係當日煲呔唔會去，律政司會派人代表煲呔上庭，而按照規定，呢個人唔係律師，只係普通官員。至於會唔會係成日同煲呔好似孖公仔咁出雙入對嘅鬍鬚曾呢，就仲未知道；照計仁龍仔大把馬仔，區區一單小額索償，未必要出動到咁大粒嘅官，否則日後人人都去告，曾俊華主任咪好唔得閒？