保安局局長李少光打完截聽條例場硬仗之後，馬不停蹄去咗外訪，先去澳洲，之後就新加坡。話就話係公事訪問，實則公關嘢，咪當做唞氣之旅，療一療立法會馬拉松辯論期間嘅內傷。呢條例，政府雖然最後過到，但期間搞到煲呔違憲，紀律部隊違法；更大劑係保皇黨黨同伐異，令立法會變成一個赤裸裸嘅鬥爭場地，失盡民心。咁嘅勝利，根本係慘勝。
噚日李少光喺新加坡，與新加坡副總理兼內政部長黃根成，及新加坡總檢察長趙錫燊會晤，又喺新加坡民防總監陳贊誠嘅陪同下，參觀新加坡民防部隊指揮室，了解有關部隊嘅職能。李局長，新加坡有好多嘢學，但有好多嘢你千祈唔好學呀！