相信好多人個衣櫃至少都有一條牛仔褲，而Wyman講過牛仔褲嘅走向係愈趨上等，以前High-end千零蚊都買到，家陣揦起手都二、三千！雖則話牛仔褲襟着啫，但咁貴一條褲，就咁掉落洗衣機洗隨時報銷，將靚牛的Detail位、洗水效果統統搞?。權衡保靚樣同衞生，着５次洗１次就係蹺妙喇。
記者：葉雪芯
攝影：何家亮、陳偉強
模特兒：Cathy
名人好棹忌 斬腳趾避洗牛
最多人遇到嘅洗牛仔褲問題，就係甩色，明明潮流興深藍，洗10次左右，條褲就變咗淺藍，唔識洗牛仔褲，真係不知不覺Out咗都唔知！是以散見於專訪中，一眾潮星都有不洗牛仔褲的習慣，余文樂更講過一世唔洗牛㖭！
洗前 見鏈就拉
牛仔褲襟污糟，想保持形態毋須次次着過都洗。老媽子又教落洗乜衫都先將拉鏈及鈕扣鎖好，就包無衰。
1.ZipUp防變形
在牛仔褲放到洗衣機裏洗之前，最好先將拉鏈拉好及把鈕扣扣好。以免褲子變形，樣衰兼不好穿。
2.唔使成日洗
為維持牛仔褲的造型及色水，其實唔使成日洗，咁當然又未至於要學一眾潮星咁着幾年都唔洗咁誇張，大家都要講衞生㗎嘛，牛仔褲又襟污糟，一般約穿5次洗1次最為恰當。
下水禮 呷醋免甩色
其實牛仔褲是用靛藍染料染色的，如果就咁放入洗衣機洗，可能會出現甩色的現象，用咗以下嘅方法，你條牛仔褲無論洗幾多次，都好似新嘅一樣㗎！
1.新牛浸鹽水
新買來的牛仔褲，千祈唔好就咁放入洗衣機洗，用1湯匙鹽（約10g）開一盆凍水，將褲先浸泡在水中10小時，往後再洗時褪色的情況便會大大減低。
2.白醋鎖色
新買的牛仔褲，還可用1:20的白醋和水浸牛仔褲20-30分鐘，同樣有效鎖色。
3.無面見人
唔係話你條牛仔褲唔見得人，係指洗牛仔褲時將面反轉來洗，將內層向外翻，咁就會襟洗啲。
4.憐香惜褲輕力浸洗
唔好咁大力搓揉牛仔褲，洗時只需要先浸泡在水中10分鐘，然後輕輕按壓，切忌用刷子刷褲子，等污糟水慢慢流出，再用清水重複沖洗約3至4次就得。
5.分開洗
深色與淺色牛仔褲一定要分開洗，幾條唔同色混在一起，會造成顏色互染，分分鐘淺藍變深藍，或者洗到一笪笪！最好每條牛仔褲都係單獨洗，咁就包無死啦！
6.謝絕漂白劑、柔順劑
不得使用漂白劑，講到明係漂白，有顏色嘅牛仔褲就梗係唔用得喇，只要掂到一小滴，你條褲就分分鐘Certified！柔順劑亦可免則免，牛仔褲都係「硬朗」啲好睇！
7.20℃以下水溫
就算條褲幾污糟都好，千祈唔好諗住用熱水洗會亁淨啲，洗牛仔褲嘅水溫最好係20℃以下，用熱水洗的話，就注定要買過條喇！
上岸 掛住你見光死
洗完老牛，咪以為上咗岸就掉以輕心，猛烈陽光暴曬一樣會造成脫色，所以「掛住你」都有竅門！
1.咪扭扭擰擰
牛仔褲清洗後亦不宜扭亁，最好係趁佢仍在滴水時掛上衣架於通風處晾亁。晾嘅時候一樣要反轉面，同埋盡量將褲管弄成圓桶狀，因為咁樣比較快亁。
2.倒掛金勾
晾牛仔褲的最佳辦法係用衣夾夾住褲腳，倒轉掛，一來咁樣褲管晾亁後會自然啲，二來褲頭唔會被水的重量弄至變形。
3.唔見得光
唔好以為陽光普照就拎條牛仔褲出去曬吓，陽光直接暴曬是會造成嚴重氧化褪色現象㗎！
4.熨斗？Noway！
用熨斗熨牛仔褲？萬萬不可！熱力易令褲變質，嚴重仲可能縮水㗎！亦唔好懶醒咁去將條牛仔褲熨到起「骨」，影響牛仔褲質料之餘仲Out爆，你估𠵱家着西褲咩！
靚牛邋遢有計
1.酒精去原子筆痕：哎吔！多手用原子筆劃到條褲㖭！用酒精先清除，再以番梘水洗滌，最後用清水沖洗，咩痕都唔見晒！
2.牛奶快速去唇膏迹：不小心劃咗啲唇膏落去，點算？快手用毛巾沾一點牛奶，輕輕地擦拭，礙眼的唇膏迹就可以抹甩㗎喇！
3.白飯治墨水迹：試吓馬上用白米飯塗抹在污迹上，用手捽3-4分鐘，然後再用清水洗抹，就算唔可以完全清洗掉污迹，但條褲都無咁傷！
