香港董事學會於六月七日宣布「2006傑出董事獎」選舉開始接受提名，今年選舉主題係「專業董事建立卓越董事會」。當時仍然係香港董事學會主席嘅許浩明太平紳士話：「當一家公司的所有董事會成員均意識到企業管治的重要性及明瞭如何達致優秀企業管治水平，則該公司方可稱為一家真正成功的企業。」
眨吓眼，許浩明已經落莊，大福證券董事總經理黃紹開接任為香港董事學會主席，許太平紳士更加因為海域集團爆煲，佢身為董事會副主席，周身唔得閒，證券L打電話通知：「八月份HongKongBusiness以許先生為封面，講公司管治，真係veryunfortunate！」
做月刊最怕碰到呢啲事，成個幾月前做好訪問，寫好古仔，點知到咗出版之時，封面主角已成為教材！海域事件令到一啲獨立非執董面目無光，跟住上個星期又爆出上海電氣兩位董事在內地被規管，呢啲事內地不時發生，中銀香港嘅劉金寶就係最佳例子，但最離譜嘅，就係宏通集團控股有限公司（九三一）。宏通喺七月三日刊登通告：「董事會欣然宣布，武鎮國先生獲委任為董事會之執行董事……初步同意收取每月二萬港元作為酬金」，到咗八月十日，宏通再出通告……武先生從未獲委任為執行董事……無同意收取每月二萬港元作為其出任執行董事之酬金，上述錯誤陳述並非故意做成，僅屬無心之失……」
玩泥沙咩，一個月零一個星期之內，該董事會成員審批過嘅正式通告，竟會係「無心之失」？班董事瞇埋眼開會乎？錯誤通告相等於發放虛假資料，屬嚴重違規，監管機構應嚴肅處置。
呢啲蝦碌嘢，對公司管治嚴重挑戰，開香港董事學會玩笑，唔怪得黃紹開話要加強專業董事訓練，因為法治制度與優質公司管治係香港資本市場之命脈，一旦失控，失守，香港就會淪落為二級中國城市，投資基金不來，香港仲有乜強力經濟支柱？旅遊係低增值，物流逐漸萎縮，貿易服務並無獨特之處。如果金融資本市場遭人離棄，香港前途係咁先。