嘩！不來梅超勁呀！上期談到搵長捧球隊，即所謂銀行球隊，要撇開賭波純為睇波嘅心態；當然球迷經常喺公仔箱睇到心儀球隊出場，做番啲功課，咁樣買落去都安心啲，如果硬要選季初名牌球隊捧場，我今季第一隊先揀不來梅。
小弟唔係呢隊波嘅「粉絲」，但賭波先不要講感情，季初百無聊賴，已經3次喺公仔箱睇足佢哋踢咗270分鐘，逢出必勝、讓球盤計全部贏盤；啱啱禮拜日仲勁，喺作客劣勢下，完場入3球反勝末段莫氣嘅漢諾威4:2，爆出個由隔夜80倍跌至臨場得番40倍嘅波膽，英超未開鑼前，呢支「梅」簡直係熱門客心目中嘅至愛。
佢哋條中前場線由老將麥哥特換上出柙小虎嘅廸亞高，再加全能射手兼世界盃後好似唔使唞嘅高路斯做重心，最正係後防未執好，開出上盤加入球「大」，你話邊個賭波友唔喜歡呀！
上盤加「大」博中兩注
個人絕少投注入球「細」，尤其係直播波。因為賭波除咗要贏錢外，當然最理想係要睇得開心，𠵱家唔係世界盃焗賭一兩場；尤其4大聯賽全開後，一個禮拜六日成十幾廿場波直播，點解要揀一兩場冇乜波入嘅悶蛋比賽投注？不過大家緊記，賭入球大細一定唔夠讓球盤好，尤其買「大」，所以其實冇乜心水，個人不建議大家賭呢類投注，一有信心就上盤加「大」，博中兩注！
不來梅本月仲有兩場聯賽，對利華古遜同史浩克04；未有歐冠纏身戰意必高昂，趁賠率未變雞肋，繼續追捧啦！
文：蘋果波神