煲呔真係識搶鏡，繼「人神共憤」金句後，噚日大鬧毀壞浩園嘅人係「心理不平衡」，話咁易又得到媒體注意，簡直可以同張文光爭soundbite王稱號。
佢晏晝見泛聯盟傾施政報告時，心理明顯平衡好多，事關席間冇乜火花，泛聯盟五子同煲呔咁老友，梗係各抒己見後就散band。好似測量界劉秀成咁，要求政府社區建設做好啲，又要盡快公布古物諮詢檢討結果，呢啲要求有幾難？煲呔聽到就乜都話會留意，佢哋收貨走人，各取所需。
煲呔今日會見鄉議局，今個星期仲有民建聯同教育界，至於公民黨同白鴿黨就仲未約到時間，聽講本來煲呔預咗個較早嘅檔期畀公民黨，以免俾人話親疏有別，但係由於公民黨有啲主要成員不在港，所以要押後，即係話今次唔係煲呔大細超。