日前浩園遭狂徒破壞，連無綫新劇《學警出更》也受影響，劇中薛凱琪（Fiona）因公殉職，並安葬於浩園，多場掃墓戲份原定於月底拍攝，但現已被迫取消。
上周六有狂徒肆意破壞粉嶺和合石浩園的29個墳墓，事件令人震驚。據知，無綫《學警出更》一劇原打算本月底到浩園拍攝外景，結果因為浩園受惡意破壞而延期甚至取消。
暫未知安排
記者向《學》劇監製黃偉聲了解時，他說：「原本我哋係安排咗月尾去浩園拍四場戲，講Fiona（薛凱琪）殉職之後，吳卓羲、陳鍵鋒同陶大宇佢哋先後去浩園拜祭佢，我哋唔會拍Fiona喺浩園嘅葬禮，但就會有佢嘅墓碑喺度，但𠵱家發生咁嘅事，警方要進行調查，浩園又要修葺，月尾嗰幾場戲全部要取消。」
問是否延期再拍時，黃偉聲說：「我哋好希望遲啲再拍，因為上次苗僑偉拍《學警雄心》時，都係葬喺浩園，要連戲，但暫時冇咁快知道安排係點。」
斥無聊過份
對於《學》劇因浩園遭破壞而取消拍攝外景，Fiona昨回應說：「我冇份拍嗰幾場戲，唔清楚係咪取消。其實唔好話浩園，就算其他墓地，啲人咁做對所有死咗嘅人都係好唔尊重，唔單止對死咗嘅人唔好，對留喺世上嘅家人更加唔好，更加深佢哋嘅傷感，更何況係浩園？啲人好無聊好過份，山長水遠去做埋啲咁無聊、咁損人不利己嘅事，真係好難理解！」
採訪：戴彩煥、何永寧
