當紅DJ森美和小儀6月初因在節目《架勢堂》舉辦「我最想非禮嘅香港女藝人」網上選舉，被商台停職兩個月，二人初時各自出埠散心，其後則投入下月公演舞台劇的籌備及綵排工作。昨日他們正式復工，森美表示所有節目會經過監察小組審查，又謂經此一役發覺「情」字比任何事重要，小儀則謂怕再次開咪做得不好，希望快點上手。
非禮選舉風波發生至今，森美和小儀公開道歉之後，一直迴避就此事發言，二人早於上周六（12日）已返電台復工，但直至昨晚才正式再為《架勢堂》開咪，昨午則先於尖沙嘴出席「森美小儀歌劇團BIGNOSE」記者會，二人日前更率先接受本報訪問，暢談對事件的感受。
開咪興奮
「好似小別勝新婚」
對於再次有機會活躍於電台，森美難掩興奮心情，他說：「冇見聽眾兩個月，希望第一晚表現好啲，經過我哋長時間諗過，電台節目會有少少修改。」重新開咪，森美指所有節目會經過監察小組審查，十分謹慎，他說：「以前唔識得珍惜，今次件事令我哋有得着，我哋同家人、朋友嘅關係更加好，好難得。」森美更自言事件已雨過天青。
森美又說：「再開咪係有啲緊張，因為兩個月冇做節目，疏於練習，惟有諗番自己以前第一日開咪係點做呢？𠵱家好似小別勝新婚咁，如果冇呢件事，都唔發覺原來我哋咁鍾意做節目，真係要好好享受開咪。」小儀則說：「係有啲啲緊張，既然錯都錯咗，唔可以因為咁而縮咗乜都唔做，我會選擇做好本份，做番好佢。未試過停工兩個月咁耐，我都驚做得唔好，希望好快上番手。」
力量泉源
「最緊要係個情字」
森美透露他們現在還有兩堂培訓課要上，內容主要讓DJ了解電台歷史、精神及寄望等，課程為期六個星期，令他們獲益良多。二人本就甚受年輕人歡迎，事件後，他們更大受狗仔隊歡迎，小儀說：「搞到我真係唔敢出街，留喺屋企睇《15/16》，睇吓其他主持點做囉，後來去咗旅行。」
至於森美則被拍得一家人外出用膳，已有一子的他，妻子正懷第二胎，雖然仔細老婆嫩，但森美表示沒因停職而煩惱，指家人朋友是他最大的力量來源，他說：「老婆大肚唔知幾開心，呢兩個月，我覺得最緊要嘅係一個情字，家人親情同朋友友情都支持我好多，啲人話我一鋪清袋都唔再重要，我覺得為情而煩惱好過為錢而煩惱。」森美又謂自己本來已十分慳家，只會對愛錫的人闊佬，現在居安思危，已將投資組合風險減低，平日則多搭小巴慳錢。
認真失禮
小春對傅穎流口水
此外，昨日森美小儀的記者會除有數十名fans到場吶喊助威外，一班有份演出的歌手包括古巨基、楊千嬅、陳小春、吳日言及王菀之等均往撐場，眾人即席表演魔術及雜技，如千嬅表演刀鋸美人、小春及傅穎（Theresa）表演叠羅漢、古巨基扮機械人、森美用牙拉三輪車及小儀喉頂纓槍等。小春在上台表演時，緊隨其後的Theresa不慎撞向他，他察看對方有否弄傷時，竟不慎流口水，場面尷尬，小春自言極為失禮。
採訪：張俊銘、蔡如玉
攝影：陳俊強
