SEP990i流港變繁體炒上萬元拍住恒指升

望梅真係可以止渴？我打死都唔信！索愛喺大半年前夠話推出P990i，點知自從舊年12月曝咗光之後，到𠵱家一直只聞樓梯響，網民更幾乎每個星期追住問幾時會出，雖然行版仲未解到渴，不過首批傳聞嚟自澳洲嘅水機，第一日賣街已炒上九千八蚊，跟足恒指自5月嚟嘅最高峯走勢！就算炒到㷫烚烚，一樣即日斷貨，《蘋果》都係僅僅班到一部返嚟，為大家做測試介紹咋！
記者：陳國輝
攝影：楊錦文
ImageGirl：Kibby

P990i曝光以嚟，就連經常同小記吹水嗰位手機舖店長，亦指明要等佢出咗先換機！今次有水貨見街，吸引力當然大；但呢批機嘅來歷確實有啲可疑，有人話佢係來自澳洲，亦有人話佢來自法國，究竟呢批P990i係何方神聖？似乎仲未有答案。但根據上次K800i測試版流入本港嘅經驗，想話畀大家知，究竟今次又會唔會係測試機第二波呢？小記已即場試用部份功能，或者可搵出些少眉目！

■機盒包裝頗為簡單，唔多似索愛一貫貪靚作風，咁都可以賣成萬蚊？

■網民知道P990i到港，二話不說就叫「預我兩部」，不過家陣可能有錢都未必買到。

疑似測試機繁體照出

雖然唔清楚佢出自何處，但水貨佬已表明呢批P990i乃由英文版改成，不論介面、功能說明、閱讀中文SMS，甚至輸入聯想字等，大部份均已經中文化，非常「完整」，對於港人用家嚟講，的確親切實用得多，難怪咁多網民Fans收到風後，幾貴都爭住話要買！
揭開Keypad後，QWERTY鍵盤亦可順利切換及使用，如果玩慣中、英文Email嘅話，實情幾啱用！不過，P系機一向講究嘅穩定、唔死機、運行流暢等強項，喺呢度仲未搵到，表現甚至可用慢嚟形容。每選用一項分唇嗰陣（例如日曆），都花上少少撈機時間，而喺短暫測試過程裏面，更出現過一次Hang機，究竟係由於測試版嘅問題，抑或完成度不足？

■隨機附送一張64MB記憶卡，抄歌嘅話應該唔夠用。

■屏幕闊度達2.8"，難怪作ViewFinder時有如此高質顯示！

■數字Keypad唔用可以拆出嚟，但要上螺絲有啲麻煩。

■試過打開中文SMS，閱讀完全冇問題，亦唔見有怪獸字。

■可選擇「九宮格」或者PDA介面嚟顯示，但Icon設計一般。

相機Wi-Fi全面升級

講到P990i功能，查實機民都應該好清楚，佢屬於P系列當中首部支援3G制式，同時亦係第一次提升至200萬像素及加入Wi-Fi功能嘅機種，不論上網、影相、聽歌，或者扮演住PDA嘅角色，均絕對稱職！另值得一讚係，今次鏡頭位採用K600i嗰種旋轉保護蓋，既美觀又可防刮花。但睇番今次呢部水貨機，表現就差強人意，例如小記曾試玩3G，傾VideoCall就冇問題，但係當諗住上網嗰陣，㩒實機側嗰粒「@」掣（快速上網），竟完全冇反應，之後再用Wi-Fi搜尋附近嘅Spot，部機突然又恢復正常上網，表現咁唔穩定，感覺恰似功能未用盡一樣！

■鍵盤由上一代Keypad位移至機身，輸入英文字比以前方便。

■視像鏡頭擺放於聽筒隔籬，用大芒玩VideoCall都幾爽！

■今次喺相機功能亦加入自動對焦，反應都唔慢。

■上網睇資訊最好拎埋支Stylus一齊用，咁就如虎添翼。

■音樂播放介面同上代唔一樣，呢次終於可插入圖片做封面。

手機Sales：IMEI可以照改！

有Sales向小記表示過，想驗證測試機，方法甚艱難！有傳如果IMEI（機身編碼）用咗「00」字頭嘅話，就有可能係測試版本；但Sales就解釋，想更換IMEI編號根本唔難，甚至有人連Firmware都可以照改，一般玩家又點會察覺得到！所以，想知道部機係咪測試版，最好方法係憑手感、功能嘅完成度嚟判斷，講到底即係經驗喇！

■某舖Sales解釋呢批來歷不明P990i，仲有好多問題，所以冇入貨。

教你查IMEI編號
■除咗機背張貼紙，仲可以打「*#06#」檢查手機嘅IMEI編號。

PROFILE

制式：WCDMA/GSM三頻
體積：114×57×25mm
重量：150g
屏幕：26萬色TouchScreen
主要功能：3G視像通話、200萬像素相機、自動對焦、WLAN、QWERTY鍵盤、支援MSPRODuo、PushMail、BlackBerry電郵功能
售賣點：謝利記（94331563）

約$8,500（水）

水貨落訂要小心

自從首批P990i閃電去貨後，先達水貨舖已極速提供所謂嘅「預訂」服務，以緩P系機迷相思之苦！但須注意，水貨機價格上落不定，萬一冧咗價，隨時變蟹民！據稱第二批貨「預訂價」約七千五，冧味盡顯。另外貨量亦冇保證，如果派貨唔夠，到時大家只有無癮空手而回。考慮以上兩點仍然博嘅朋友，小心。