如果你發現身邊有啲朋友，無端端唔見咗影，最好都係checkcheck，睇吓佢係咪出咗事。好似港區人大代表團長、招商局董事袁武咁，呢幾個月都好似冇喺公開場合露面，就連7.1回歸酒會都唔見影，唔通好似霍老咁有病在身？於是噚日撥個輪去問候佢。
袁總喺電話聽到八方咁講，都哈哈大笑。冇錯，佢係有病在身，但當然唔係霍老嗰隻。話說袁總喺4月時一個唔小心，喺屋企跣低咗。呢一跣非同小可，竟然令菠蘿蓋碎咗，要做手術先搞得掂，而且仲要休息好長好長時間，結果呢3個月咪被迫隱形囉。
為免人哋以為佢有乜事，袁總就算要攞枴杖，都一拐一拐咁返番工，暫時做住鐵拐李，至少畀人見到佢完整無缺，唔使擔心。