媽咪：
考咗牌咁耐，每次同你講話我想買架四驅車，你總會搵到藉口唔畀買，一係就話太大架我揸唔掂，又話四驅車好大食，油費好貴，其實我知你係有苦衷，你成日話揀車同揀男仔一樣唔可以單憑外表，但你唔使擔心，我最近睇中咗鈴木啱啱新出嗰架Jimny，佢唔單止個樣比上一代後生又Trendy咗，仲將個4驅波箱變成按鍵式，㩒一㩒就可以由2驅變4驅，市區行車或上山都一樣可以應付自如，而且車形細細架，易操控、易睇位，唔信？我啱啱同佢影咗輯相，包你睇完都會鍾意佢！
女 小敏字
新Look好型又Young咗，襯我呀。
我承認，鍾意新一代Jimny，係因為佢個樣比以前有型又後生咗，尤其係換上全新設計的「格仔網」大泵把、新款5幅式合金胎軨、車身原色倒後鏡之後，睇番佢上一代個樣，更有4驅味道，尤其是個大泵把，望落搶眼得多。
唔只個外形有改善，就連車廂設計都愈變愈Trendy，好似中控台咁，以前用晒房車形撥掣，新車就唔同，改晒圓形扭掣，鋪排較以前歸一，仲有個波波形冷氣出風口、運動型3幅式軚盤，同我一樣咁Cute，內內外外都充滿住Sporty元素，啱晒好似我呢類鍾意有型又得意嘅後生女口味。
四方的骰，唔使驚揸唔掂！
我個子唔高，泊車又係我嘅弱項，所以每次揀親大型四驅車你都話唔好，驚控制唔嚟，如果係Jimny就唔會喇，因為佢係部名副其實嘅城市迷你四驅車，外形四四方方成個盒仔咁，頭短、無尾、車身高，加上兩邊側鏡又夠廣闊，泊位睇位我都搞得掂。
5前速波箱夠順暢，反應夠敏捷，我一揸上手，覺得無論外形同內涵都同我好夾，如果再加多少少「補品」，好似車尾倒後鏡、腳踏、頭、尾防撞架，我相信同埋你一齊出街會仲威，咁唔知你會唔會幫補少少呢？
按個掣就改變四驅模式，上山落地好安全。
你成日教我做人要實際，養車最緊要揀架實用，呢個亦係我鍾意Jimny嘅原因，佢有5前速手波同4前速半自動波兩款揀，同樣有個四驅波箱，只要㩒一㩒中控台個2WD掣，就會自動轉換成2驅模式，適合平時On-road，慳油啲，遇到要行山路，㩒4WD轉成4驅模式就應付自如；另一個4WL係用喺再斜啲嘅山路。呢三個掣都好易搞，唔似上一代咁用波棍咁麻煩，上山落地一樣可以安全度過。
就咁睇佢馬力同扭力可能令你對佢大打折扣，但Jimny出晒名外形又細又輕，我試過用佢載滿四個成年人上斜路，一路上佢亦無令我失望，所以以上問題並不大，而且你話過最怕我開快車，Jimny外形四平八穩，入彎平穩，相信這點已足以令你安心。
SuzukiJimny
Specifications
引擎：1,328c.c.直4DOHC
馬力：85ps/6,000rpm
扭力：110Nm/4,100rpm
傳動：5前速手波
車價：$145,000
車輛提供：香島汽車（23320091）
記者：黃婉冰
攝影：陳陶鈞
Model：Hiburn（Salvador）