林瑞麟幫煲呔炮製嘅特首班子擴展大計，建議增加22個副局長同埋局長助理，內外都冇好評。林D8個幾星期前喺政務官（AO）圈子搞咗多場「演唱會」，向佢哋推銷。有份出席嘅政務官同八方講，林瑞麟都講咗一啲老實說話，佢明言班子大咗，政務官工作量有加無減，事關呢班新人類對政府運作唔熟，自然好多嘢會問，要靠政務官。
班政務官就好唔滿意，當初設立局長制，煲呔幫老董推銷，話明會減輕政務官工作量，𠵱家搞吓搞吓，分分鐘多一班更加幼嫩嘅小政客，又係要政務官服侍。政務官本身要負責研究政策，又要應付立法會每星期大量問題，已經冇乜時間靜低落嚟諗吓嘢，好影響研究政策嘅質素。奈何煲呔擴大班子事在必行，跟住落嚟真係冇眼睇。
有個年輕政務官即場問林瑞麟，話𠵱家有啲局長做得唔係咁好，可唔可以畀佢哋降職做副局長，累積吓經驗？呢一句唔知係咪暗寸林瑞麟，但佢答得幾幽默，話搵副局長同局長助理係搵啲青年才俊。其實局長做得唔好，梗係要out啦，只不過𠵱家唔係市民話事，特首要攬住庸官，市民都係冇聲出。