今個禮拜周中繼續有巴甲畀大家玩，個人心水係揀近期「弗」到漏嘅彭美拉斯主勝，串「主場王」山度士主勝。
頭關彭美拉斯季初曾經試過5場不勝，以1和4負排行榜尾，但佢哋趁世界盃舉行、聯賽休戰時加緊訓練；重新調整後，即反彈踢出5勝1和佳績，仲成為近期捧場客嘅至愛。佢哋上場喺作客情況下，輕鬆贏實力唔錯嘅保地花高；再之前嗰場作客，大半場喺10人應戰下，都頂得住福塔雷薩。再睇埋近排主場成績就更有信心，近2場全勝入8球，加上球隊領導層早前話過要重振呢支昔日勁旅嘅聲威，彭美拉斯主勝就更信得過！
青年人作客弱咪掂
對家青年人係典型「地頭蟲」，佢哋9場主場只輸1場，但係一到作客就即刻「腳仔軟」，7場作客輸足6場，巴甲20隊當中作客排尾3；今次又作客，當然係撐對家之時啦！
尾關有近排「霎」醒嘅山度士，近4場3勝1和。細心啲睇埋個主場成績，7場主場6勝1和不敗，入14球只失4球，當中仲贏過國體會同哥連泰斯，何況佢哋𠵱家想趁聖保羅同國體會分心南美自由盃時追上？所以主勝應該冇問題。而對手高士路近期表現下滑，5戰不勝，只取2和3負，後防更加係「有球必應」，近2場已失足6球，陣內又傳出球員士氣低落，今仗實難看好。
阿占
有線球彩台主持
電郵：[email protected]