「漢堡王」（BurgerKing）終於喺機場禁區以外地方開分店，身邊同事大嗌：「嘩！好好味㗎。」、「啲牛肉好Juicy㗎。」搞到未食過「漢堡王」嘅我都好期待。山長水遠走到山頂新分店試食，結論係──我將會成為山頂常客！畀埋貼士大家，成個包一嘢質入口大啖咬最過癮，食到成嘴汁？好味咪得囉。
記者：黃若茵
攝影：黃子偉
模特兒：Peggy、Katie（Salvador）
煙肉芝士雙層華堡$42
全場最豐富餡料嘅漢堡包，有兩塊牛扒、煙肉同芝士，咬落啖啖肉，女生要食得小心啲，咁多餡好容易食到失晒儀態㗎。
天椒華堡$30
傳統華堡，加最新研製嘅辛辣醬，入口極速刺激舌尖，唔算勁辣，不過勁香，令本身已經非常Juicy嘅牛肉變得更惹味。
大啖咬！
Harvey：「食漢堡包我鍾意狂咬，最好茄汁整到落嘴邊，咁wild先似食漢堡包㗎嘛！」
華香雞排堡$27
為配合炸雞形狀，呢個雞排堡特別用咗7吋長麵包，望落幾似熱狗包。雞排幾好肉，唔會炸得好亁，醃過嘅雞排好夠味。
搣住咬！
Annie：「雞扒容易搣開，搣到細細件先放入口，斯文好多，喺街食都唔怕粗魯。」
華鱈魚包$20
魚柳肉夠厚粉漿夠薄，同Tartar醬好夾，不過呢個華鱈魚包似乎醬料太多，掩蓋晒魚肉味道，建議Order時要少醬。
分開咬！
Vinny：「魚柳炸得香，分開食先食得真啲香味，一啖香口魚柳再一啖清淡生菜，畀味蕾過冷河。」
雙層芝士漢堡$27
用較細個只得4吋嘅麵包，呢個Size專為胃口細嘅人而設。雖然細，但兩層芝士牛肉，食 起來相對地多餡，一樣好滿足。
刀叉食！
Winnie：「我鍾意切開逐件食，保證每啖都食得到辣味，又唔怕整污糟雙手。」
過10分鐘即棄
「漢堡王」3年前已經踏足香港，可惜地點係機場禁區，唔揸住張幾千蚊機票都唔使旨意食得到。今次山頂開新分店，仲覺得遠？其實近咗好多㗎喇！經理Rebecca話：「一直以嚟，都有唔少客人問我哋幾時會喺市區開分店，有客人聽到喺山頂開分店都話遠，其實總好過要出境先有得食嘛！」叫得做「漢堡王」，總有啲響朵招牌菜，唔使講，問十個Fans十個都會話至Like塊牛肉，「我哋一直堅持明火烤牛肉，所以你會見到漢堡扒上面有一條條直紋，其他快餐店只會煎，煎會令牛肉變得亁身無肉汁，明火烤夠高溫，保留到肉汁，咬落唔亁。」即烤有肉汁，擺耐咗又點算？「我哋只會預先烤小量牛肉，過10分鐘都賣唔出即棄，寧願再做過新鮮嘅，正因為咁，所以要請多啲人手去烤扒。」
8款醬汁任擇
塊牛肉掂，配料醬汁都唔可以馬虎，Rebecca話：「嚟得呢度食漢堡包，所有配料好似青瓜、番茄同埋各式醬汁，客人都可以隨意加減，最多可以加到比原有份量多一半，如果真係想再加多啲，理論上我哋都會照做嘅。」除最常見嘅茄汁外，另有麻辣醬、Chilli醬、黃芥辣、蛋黃醬、甜酸醬、BBQ及Tartar汁畀客人選擇，咁多款，有排我試呀。
熱辣脆雞翼 4隻$25
機楊分店都無得食，特別為今次山頂分店開張推出。嚟自美國嘅雞仔肉質好嫩滑，粉漿唔太厚，剛剛好，點甜酸醬最惹味。
蘋果批 $8.8
賣相跟某快餐店極似，不過味道方面就比較甜，而且蘋果肉大粒又爽脆，食完漢堡包唔夠喉的話，咬多個批當甜品就Fit晒！
搵食攻略
漢堡王（28492275）
地址：山頂凌霄閣1樓
營業時間：星期一至四9:00am-10:00pm，星期五至日及公眾假期8:00am-10:00pm
全店座位：76個
交通：山頂纜車
人均消費：$40
最好賣：華堡，日賣逾千個（根據機場分店數據）