上個月中，經紀黃在中糧國際（506）跌到落4元邊時話抵買，之後隻股真係升番唔少。中糧上周五升4.85％，收4.7６元，成交金額2373萬元。
經紀黃話，中糧將於本周四公布中期業績，有多間證券行出報告唱好，預期業績增長唔錯，加上有業務重組概念，所以隻股近排表現咁好。
多間證券行中，最捧場要算係摩根大通，份報告足足有成廿幾三十頁紙，目標價定到5.90元咁高。摩通話，相對其他大陸內需股平均PE高達廿幾倍，中糧顯得便宜，旗下的長城酒業增長強勁，加埋重組業務的概念，隻股實在買得過。
另外，賭王提到澳博旗下貴賓廳收入冇以前咁好，但澳門金沙貴賓廳收入就愈嚟愈好，於是想起浩基（628）正係經營金沙貴賓廳叠碼仔生意，照計金沙咁掂，浩基亦應該受惠，但小初唔明，浩基自年初公布收購叠碼仔生意，股價見過2.325元後就無以為繼，上周五收1.49元，跌0.67%，究竟發生咩事？
慕容小初