山西省省長于幼軍談話風趣，給人留下深刻印象；而正在港招商嘅遼寧省省長張文岳，則思路精密，記憶力特強。呢班省級一把手，愈嚟愈醒，煲呔特首真要努力再努力，否則好易相形見絀。
話說上周五喺遼寧省招商開幕禮上，張省長面對住800名港商，介紹遼寧省嘅最新經濟環境及發展形勢，佢企喺台上講咗足足1粒鐘，冇貓紙，唔使人提水，由感謝港商出席，講到遼寧同香港嘅經貿關係，遼寧嘅經濟、外貿、外商投資、基建發展，到今次來港重點推介嘅「五點一線」沿海開發計劃，以及港商可以到遼寧投資嘅商機……華華收到嘅講稿足足15張紙咁長！
咁都唔止，最厲害係佢講嘅內容，總共涉及大大話話100個數據，佢都隨口噏得出，完全唔使睇稿！咁好記性，千祈咪得罪佢。