楊千嬅將會喺11月約滿金牌經理人公司，有傳佢會轉投東亞唱片，以4,000萬簽約兩年，前晚佢喺會展大禮堂為懲教署儲蓄互助社15周年社慶做表演嘉賓，佢嘅經理人金牌公司老闆黃柏高（Paco）都有到場，好多記者追住問Paco千嬅係咪唔再續約？佢笑笑口講：「聽到我嘅藝人咁有價值，當然覺得係好事，𠵱家已經同佢傾緊續約，但我哋梗係冇4,000萬，大家都知我哋窮。」
傾新片合作
Paco話睇好千嬅事業可以更上一層樓，所以公司係好有誠意同佢傾續約。至於千嬅俾記者問到早排有人見到佢同寰亞電影嘅人有飯局？佢話：「我之前同寰亞拍咗部《天生一對》，同佢公司嘅人梗係有接觸啦，最近同羅永昌導演都傾緊下部戲合作呀！至於同金牌已開始傾續約嘅事啦！」
