英國倫敦驚傳恐怖分子密謀炸美國航空公司客機，八方第一時間就為白鴿黨嘅張文光擔心，因為佢個女喺英國讀緊大學，成日要飛嚟飛去。
張文光就好醒咁話，自從911之後，佢一家人都搭晒國泰機（陳南祿應該頒個獎畀佢），因為啲中東佬始終畀番幾分面中國政府，捉咗中國人都有機會放，所以特區嘅航空公司都有保障啲，應該安全過美國或者英國航班。
時間過得真快，張文個女今年升讀大二，主修電腦同數學，個女𠵱家喺香港放暑假，遲啲如果有空檔，張文會陪女返英國繼續學業。張文光年紀唔係好老，不過，就唔知點解做咗長者雜誌「長訊」嘅封面人物，佢話，個記者一話係羅致光做出版人佢就即時答應受訪，因為怕羅教授話佢大牌。
佢喺訪問中介紹咗兩本好書畀長者睇，一本係余世存嘅《非常道》，另一本就係日本住友信託銀行輯錄嘅《60歲的情書》。