《信報》賣股權畀小小超全城注視，上星期五，老闆娘林太終於現身同編採部員工開會。最緊張《信報》嘅人，其中一個肯定係《經濟日報》老闆馮紹波。咁蹺喺同一日，波波又同經濟員工開會，牌頭係「點解會捐一成股份畀港大」，但啲員工又點會唔問吓老闆點睇《信報》。
話晒小小超財雄勢大，《信報》老總陳景祥噚日喺商台話，相信小小超有心將《信報》變做華文嘅《華爾街日報》，仲要搞埋網站，咁對《經濟》都咪話冇壓力。不過《經濟》睇嚟暫時冇乜板斧，八方聽聞會上有人問波波點睇《信報》，但波波都係冇乜新嘢講，淨係老調重彈，叫大家繼續做好啲喎。
波波最近捐咗接近成億銀股票畀港大，可惜員工唔係幾受，話佢對人闊綽，對自己伙記就……有人仲喺會上問：你捐咁多錢搞香港教育，咁會唔會撥多啲資源畀員工，畀佢哋增值呀？點知波波竟然話，每人都有好多意見，有啲話要換地毯、有啲話要加人工，咁你話做邊樣好？《經濟》每年都賺成幾千萬，換咗地毯就加唔到人工？唔畀多啲錢留住啲好員工，又點同小小超爭呀？
至於林太個會，就仍然停留喺「小小超一定唔郁得editorial」嘅自我陶醉階段，仲喺員工面前讚阿澤楷係有心人；但有個小記者唔識死，竟然問「試婚」不成功怎麼辦？林太馬上火都嚟埋，猛話自己唔信呢家嘢，「結就結，點會係試？」