消費blog:煮咖喱唔使再怕洗煲

消費blog:煮咖喱唔使再怕洗煲

日本作家高木直子嘅漫畫文字作品《一個人住第5年》係暢銷書榜常客,對我哋班單身OL貢獻良多。佢將單身女仔遇到嘅開心同煩惱都講得好貼切,係繼電視劇《SexandtheCity》後嘅OL界聖經。呢個網頁可以睇到本書嘅介紹:www.titan3.com.tw/titan/fiveyear/index.htm。
本書講過嘅嘢,我其中一樣最認同就係,一個人住最鍾意煮可以放得耐啲食物,例如咖喱,因為每次可以煮多啲,分開幾餐食㗎。不過,要洗黐滿咖喱嘅煲,真係噩夢。(o_O)
台灣網友志玲教我一個好辦法,煮完咖喱之後,倒出即刻食嘅份量,其餘留喺個煲,趁熱放入切碎嘅大菜糕絲,搞到大菜糕絲溶晒。最後,用布抹去煲邊嘅咖喱,然後放埋一邊;食完飯,啲咖喱就會凝固,將成嚿「咖喱糕」倒出嚟,啲咖喱唔會黐住嗰煲,洗乾淨,話咁易。
無味嘅大菜糕絲,唔會影響咖喱味道;用保鮮紙包住啲咖喱糕,雪喺雪櫃。要再食,切啲咖喱糕出嚟,灑少少水喺面,放入微波爐叮兩三分鐘,就變番美味嘅咖喱汁,用嚟撈飯,yummy!~(^o^)~
志玲仲教我煎魚前,搽少少蛋喺魚面,就無咁易黐鑊,搞到魚皮甩晒。食家劉健威就話,有個民間嘅小智慧,就係用薑捽個鑊,然後猛火燒紅隻鑊,煎魚都無咁易黐鑊。
逄周一至周四刊出