今年會考狀元特多，攞十A者有二十五人，真係難為咗各報記者，追尋二十五人姓名、學校，逐一訪問，比往年辛苦好多。
左丁山睇吓睇吓，竟然發覺有兩位狀元係世姪女，一位係副總H與科技T嘅乖乖女。副總H與科技T兩人都係中大MBA，讀書時有一位同學叫做Paul簡（簡文樂），畢業後，冠軍簡搵同學幫手管住間公司，於是副總H喺「冠軍」一做就做咗成二十年，嫁咗畀科技T，生下千金，呢位千金竟然叻到成為會考狀元，威晒，立即打電話去恭喜，副總H大概聽電話聽到手軟，冇時間回覆。
另一位女狀元係賓架L嘅二千金，大千金已經叻啦，舊年入咗袁天凡嘅母校芝加哥大學，讀經濟，今年二千金重巴閉，成為十優狀元。打電話恭喜賓架L：「喂，配種優良噃，父系冇得彈！」賓架L亦係識馬之人，即刻講：「母系遺傳多啲！」講完笑，問L千金有乜計劃，賓架L話：「等佢自己諗啦，大女讀完中六就入咗芝加哥，佢話嗰邊讀書，功課吃緊，主修經濟唔易玩，二女留番香港或去美國，睇佢鍾意。」芝大經濟學教授攞諾貝爾獎特多，香港學生去到，覺得經濟學吸引力最大，數吓手指，啲世姪、世姪女，包括賓架王（剛返回中國做民生銀行行長）位公子，恒生關太位公子，投資W位千金，加拿大大編輯位千金，再加埋賓架L位大千金，都係芝大經濟系校友、學生。唔少人識得嘅芝大經濟系校友就有袁天凡、雷鼎鳴、陳家強、陸炎輝、王于漸，位位都係名人。經常在《蘋果》評論版發表文章嘅鄧文正，以及專寫暢銷書嘅李天命，就係芝大博士。咁多名人校友之中，袁天凡好突出，做咗芝大校董好幾年，捐錢回饋母校超過一千萬港元，宣揚芝大人文通識教育不遺餘力。有一次佢到中大向MBA學生演講，引用但丁、柏拉圖，嚇人一跳，就顯示咗芝大要學生讀古典名著嘅影響。