點解咁多人一聽老董個名就好㷫？原因之一，係佢任內推出八萬五政策，搞冧樓市，好多市民無啦啦變咗負資產。其實嗰時有份協助老董制訂房屋政策、力推八萬五嘅CYLeung（梁振英），都係幫兇，唔可以怪晒老董。
但係CY好似唔記得自己當年嘅「惡行」，噚日上港台做訪問時，強調八萬五建屋政策喺回歸前已經訂咗㗎啦，特區政府都係按本子辦事，落實執行政策啫。佢跟住又話，當年衝擊香港樓市嘅導火線，其實係亞洲金融風暴喎。
言下之意，即係一切都唔關佢事，自己係無辜被屈。一個行會召集人，竟然咁冇承擔，怪唔之得有人聽到呢番說話，都猛問八方：乜CY改咗姓賴咩？CY係咪改姓冇人知，但係真係有人同八方講過，八萬五呢個數係由黃星華同華賢仕97前搞出嚟嘅，不過，CY同老董就照單全收，當係自己嘅傑作，結果搞出個大頭佛但又唔認賬，梗係得人憎啦。