早兩日《蘋果》頭版大大隻字，講iPod可成引爆兇器，當晚即時引起唔少網民評論，不過唔係話《蘋果》誇張化，反而個個諗起幾年前PS2事件（當年傳有某中東國家偷運30部PS2，作運算導彈軌迹之用），跟手仲將「IT潮物變殺人兇器」話題擴大，一堆網民爭相舉例㖭。其中就有人提到，將大牛龜PMP變遙控炸彈、Notebook變盾牌、PSP變飛鏢發射器、手機變閃光彈、XBOX變駭客Server等等。嘩！佢哋真係創意無限，不過從另一角度睇，時下嘅IT產物，科技的確進步得好快，尤其遊戲機，機能同運算速度都可拍住商業機構嘅伺服器，PDA同手機亦愈變愈強，連線上埋網，能做到嘅事就更多，若係立壞心腸，呢堆科技產品嘅威力真係不可小覷！
記者：徐影龍