上個禮拜，孫柏文相信好多《金手指》fan屎都知道澳洲佬梅鐸嘅新聞集團（NewsCorporation），同Google簽咗一份合作協議。雖然兩間都係世界級企業，仲要唔係「吹水唔抹嘴」嗰種空泛嘅合作協議，而係每年有電話號碼咁長嘅銀碼過手之合作協議。不過，我相信大家可能唔會太關心協議嘅內容。
無他，因為新聞集團同Google始終都冇喺我哋特區上市，兩間大家冇得炒嘅公司，又點會引起我哋特區人關心呢？雖然如此，我今日都要同大家講吓呢份協議，因為完全可以配合孫柏文對傳媒業嘅「互聯網篤爆傳統傳媒model」論。
首先，Google應承由2007年至2010年，最少畀新聞集團9億美元。如果新聞集團旗下嘅網站，可以超越普遍認為絕對做得到嘅瀏覽、下載率，Google就要畀更多錢新聞集團。大家會問：「又係網站？Google又學啲千禧年dotcom咁燒銀紙？Google點靠新聞集團搵錢呀？」
其實，大家千祈唔好覺得Google係一間幫人搵資訊嘅公司，唔好將佢哋視為一間searchengine。Google其實係一間廣告sales公司。Google賣嘅服務，只不過幫想賣廣告、推銷產品嘅企業，比較準確咁搵到買家睇廣告。而每一次大家免費咁用Google上網搵嘢，大家只不過係幫Google將自己分類，變成「可被推銷」產品嘅目標。所以，Google可以喺任何一個將用戶分類嘅網站中搵錢。甚至乎可以話，任何用戶自行分類嘅網站，都會係Google最大嘅金礦。
大家可能會再問：「如果咁講，即係話Google可以好輕易喺新聞集團旗下嘅網站，將用戶分類，繼而推高搵到有興趣買產品嘅人嘅機會率。如果係咁，點解新聞集團唔自己做番，要同Google合作？」因為新聞集團知道冇人比Google更能夠準確搵到有興趣買產品嘅人，其他公司唔可以，新聞集團本身啲sales更加唔可以，所以就畀Google做，將成隊廣告sales外判。呢個可能因梅鐸係跑廣告出身，所以識英雄重英雄。
製造資訊也外判
新聞集團作為一間賣資訊賣information嘅傳媒公司，心知只有兩個方法可以搵錢。第一係要用戶、讀者直接畀錢買資訊（用特區報紙做比喻，即係大家每日買報紙要畀嘅6蚊）。第二係將用戶、讀者，變成「可被推銷」產品嘅目標，收取廣告費。咁喺互聯網世界，任何資訊例如文章、電影、音樂等等，都可以被翻版，仲要愈精采就愈被人翻版（再用特區報紙做比喻，等於將報紙最精采嘅文章、圖片，用可以完美複製嘅影印機影印，跟住免費派發），未來根本已經冇可能用第一種方法搵錢，所以只可以靠收廣告費。
有見及此，新聞集團就試將自己變成一間賣「免費完美影印及免費文件發放服務」嘅公司，不過每次有人「影印」，「影印機」出嚟嘅「紙」，都預留空位賣廣告。廣告當然由Google跑番嚟。仲有，新聞集團提供嘅「紙」，除咗可以喺「影印機」用之外，仲可以畀人自己寫嘢上去，由新聞集團幫你發放。
當然，正當你係一間發放得愈多「紙」就愈搵錢嘅公司，而「紙」嘅成本差唔多係零嘅時候，你當然希望有多啲人製造更多資訊去發放。而新聞集團最精采嘅一步棋，除咗係將成隊廣告sales外判之外，仲係連製造資訊都完全外判。
外判畀邊個？如果大家睇吓新聞集團嘅網站myspace.com，外判寫手有自拍嘅濫交中學生、煮餸好叻嘅姨媽姑姐、貼親股都錯嘅前線股票經紀、生活喺巴格達日日食子彈嘅醫生寫日記等等。大家可能會問：「究竟有冇人睇㗎？」呢個相信有目共睹，可能真係有人覺得以上嘅外判寫手，寫嘢好睇過報紙「教育版」記者、副刊講烹飪嘅專欄作家、我呢啲財經口水佬或者巴格達戰地記者寫嘅嘢。
不過，myspace.com有超過一億個外判寫手，反而員工數目只有三百人，就算「密食當三番」，都可以贏到爆廠，絕對可以喺三年之內賺9億美元。仲有，myspace.com唔係新聞集團做出嚟，佢哋只係舊年用5億美元買番嚟。你哋話如果舊年有人同我哋特區嘅傳媒老闆例如TVB邵逸夫爵士講：「出5億買個網站番嚟，不過網站上面係畀人語無倫次，但個網站可以幫你賺大錢。」你話佢敢唔敢買？佢又會唔會信？
一間將廣告sales及製作完全外判嘅傳媒公司，一間唔需要煩跑廣告同唔需要煩製作、寫作出品水準嘅傳媒公司，唔通就係完美嘅傳媒公司？
孫柏文