雕刻食材係藝術，要替菜式增添美感，好考師傅真功夫。傅師傅有幾十年煮中菜經驗，人健談謙虛，問佢點學到呢門好手藝，佢尷尷尬尬答：「唔……其實呢樣嘢呢……好講天份嘅，我細細個已經好鍾意畫畫，做廚之後對雕刻食材好有興趣，初初跟師傅學，手工當然比較粗糙，不過只要見師傅雕過一次，我返到屋企就可以雕番出嚟。」過目不忘，呢啲唔係天份係乜？
表演時間到，傅師傅戴住副眼鏡，一手拎住件蘿蔔，雙眉緊皺全神貫注，一刀又一刀咁刮蘿蔔。我心急，問佢雕乜，佢話：「鯉魚，雕條鯉魚唔使1粒鐘㗎，時間唔算長㗎喇，最高難度試過用同一個南瓜雕3隻雀仔，中間仲要圍住朵花，嗰次我雕咗足足4粒鐘。」邊雕邊接受訪問，一提到上海師傅就特別興奮，因為一身好功夫學自上海家鄉：「喺上海，我做好多食材雕刻，每次都有一大籮蘿蔔畀我揀㗎，試過籌備過一個二千人宴會，我連續雕咗整整一星期。」栩栩如生嘅蘿蔔飛雀、仙鶴同鯉魚終於上碟，師傅整理錦盒入面嘅大小雕刻工具，「呢盒嘢跟咗我廿年，訂做都做唔出最啱自己心水嘅工具，所以索性自己去工場親手做，我將啲不銹鋼做到好薄，咁可以雕得精細啲。」的確精細，見到碟上面咁靚嘅雕刻，我差啲唔記得夾嘢食㖭。
記者：黃若茵
攝影：陳盛臣
1.師傅親手做呢排由粗至幼、圓至扁嘅雕刻工具。
2.用3隻手指夾實工具，用無名指輕輕頂住蘿蔔，就住力先唔會整爛雕刻品。
3.完成品用水浸住，可以保持到一個星期。
清炒河蝦仁$160
龍井茶葉同新鮮淡水蝦落鑊炒，有鮮味有茶香。一般炒蝦仁比較油膩，呢個炒蝦仁油份剛好，一啲都唔覺膩。
松子雞米$88
炒香雞米、松子、醬瓜、冬菇同馬蹄，每塊生菜裝一分松子雞米，食嗰陣用生菜包好，楔入叉子燒餅內，口感夠晒豐富。
內蒙古烤羊架2件$136
羊架直接由內蒙古入口，肥肉少好嫩口。烤熟羊架先加花椒、辣椒，入口先感覺到辣味，羊味要慢慢細嚼。
東來順（27332888）
地址：尖沙嘴麼地道69號帝苑酒店地庫2樓