恒指上周三最高17349，啱啱突破5月初高位17328（高出21點），周五埋單收17249，全周升幅362點，跑贏全世界主要股市。要破5月高位，須有特別利好因素配合，暫時要先唞唞氣，入市玩C輪，忍忍手，或者等有平貨先至落場，又或者向落後股份嘅C輪打主意。
地鐵C輪9044：地鐵（066）派完成績表後，上周五見20.35元後回頭，收19.96元，跌0.14元。盤數靚，但市場好多時嘅反應係即時有回吐。等回吐多幾格，趁低買C輪，啱睇對象係9044。隻輪12月初夠鐘，輪價22.8仙，溢價3%，槓桿率8.8倍（有效6.5倍），引伸波幅28.9%。
上周五，地鐵C輪3736散20%，收28.5仙。
隻輪得兩個幾月壽命，行使價22元，溢價11.7%。咪貪佢跌得多而上車，地鐵到底係移動緩慢股份，隻輪溢價日日縮啲，好傷。到11月初，正股如果升唔夠2.04元以上，呢隻輪就係咁先，冇得剩。
港交所C輪3633：港交所（388）或為恒指新貴，今日會成為市場焦點之一。如果升得多，撲落去買C輪，好易變蟹。穩陣啲，吼低位至上車，揀3633，10月尾到期，輪價47.5仙，溢價5.5%，槓桿率10.9倍（有效6.7倍），引伸波幅40.1%。372210月尾到期，溢價17%，買呢隻，輸多過贏。
章盛