立法會議員民望排名榜上，主席范太唔使做啲乜，都永遠排第一，情況同高官一樣，愈唔做嘢愈高民望，可謂特區奇景。范太民望高企，但唔知有無人記得，范太以前有「江青」呢個唔係幾好聽嘅外號呢？范太噚日上商台節目，自己都承認當初聽到呢個外號都唔忿氣，好想同人解釋：但後尾諗通咗，覺得人哋點諗係佢哋嘅事，咪由得人囉。
范太仲話，江青後生時都係大美人一個，自己竟然同美人齊名，有明星咁靚噃，都好正啫。估唔到范太都幾有阿Q精神，識得咁樣安慰自己。
問到范太08選唔選？佢都係嗰句「仲未決定」，完全無驚喜。至於可唔可以帶到60位議員訪問內地，范太自貶為輕量級人物，唔同重量級人馬煲呔，一講帶隊出發中央就OK。佢建議同僚如果想去北京，不妨求吓煲呔。唔知大家聞唔聞到有啲酸味呢？