資深股票客戶謝太：喂Karen，今日係唔係又有壞消息？
年輕貌美經紀Karen：係啊謝太，我最初叫你買嗰兩隻「市跌就贏、市升就輸」嘅恒指熊證，因為恒指升穿17300點，所以觸動到回收機制。兩隻都要輸蝕超過六成。今次真係我睇錯市，累到你要輸錢。早知叫你買普通恒指認沽證算數，起碼今日唔使被回收。
謝太：唔好咁講，我都係睇淡後市，先至會買嗰兩隻熊證。冇辦法，你都記得以前炒普通認股證，我最憎就係認股證有溢價。而因溢價膨脹或縮減，係莊家決定，所以莊家只要提高或減低溢價，就算認股證後面隻股有上落，隻認股證都可以唔郁。
Karen：記得。我記得有一日你用咗足足二十分鐘，不停咁鬧個認股證發行商，之後幾日仲要喉嚨痛。
謝太：所以我記得牛熊證出場嘅時候，我都叫你幫我研究、解釋下牛熊證係乜。你話過，牛熊證冇溢價，後面隻股郁，佢就會一齊郁，雖然你都警告過我，有回收機制，我都覺得冇問題。到我都相信要睇淡後市之後，你幫我搵熊證買，當然就天公地道。如果你冇幫我搵熊證買，仲要叫我買普通認沽證……
Karen：等於我冇細心聆聽你嘅需要，分分鐘可以畀你話失職㖭。不過，就算我睇淡後市，都唔應該再買恒指衍生工具，例如認沽證或者熊證。因為雖然就算恒指挑戰上次全年高位，大多數指數成份股比起5月上次高位都係低好多。不過，其實今次升浪全靠941中移動同005滙豐。咁我都唔知道呢兩隻股票仲可以升幾多、幾耐。不如重新研究點解我睇淡後市嘅原因，重新發掘投資項目。
謝太：咁都好。我相信你講得出口，即係話已經研究過。你發掘到啲乜，我可以買？
Karen：今時今日睇淡後市，都係因為我唔信伯南克，唔信聯邦儲備局可以控制通脹。上個星期，聯儲局宣布「暫時停止加息」，即係話對通脹壓力已經做足「預防措施」。如果通脹壓力唔減，先至會「重新繼續加息」，去「醫治」通脹問題。相信謝太你都聽過英文有一句，anounceofpreventionisworthapoundofcure。
謝太：嘩！就算用大陸秤，十両先至等如一斤。如果你話今時今日落一両藥去預防通脹，等如他朝用一斤藥去做治療。今日唔加息0.25厘，第日咪要加兩厘半利息先至得？
Karen：其實，我一路都覺得聯儲局要加息加到6厘。比起今日嘅5.25厘仲差0.75厘。我諗聯儲局第時真係可以加多7.5厘利息。仲要第日加到12.75厘嘅時候，市場會覺得仲未夠。
謝太：真係70年代尾、80年代初嘅翻版啊！
Karen：不過，市場仲未覺悟，覺得治療通脹好過預防通脹。所以我建議謝太你等下先，到市場覺悟嗰日，先至再投資。