恒隆大老闆陳啟宗啱啱簽咗約落實喺瀋陽投資，起商場、寫字樓同酒店，涉及資金高達10億美金，佢好坦白咁話，咁大個商機，唔係佢自己發掘出嚟，而係有一個講半鹹淡廣東話嘅內地女人指點，呢啲咁嘅機緣，真係可遇不可求。
陳啟宗話，92年第一次去瀋陽，當地只得兩間百貨公司，佢覺得東北係工業老區，已經有好多大企業，所以冇乜為意呢個地方。
直到三年前喺上海撞到兩個恒隆嘅商場租客，其中一個女士，好直接咁問佢點解唔去瀋陽投資？仲猛咁叫佢去睇吓。個租客話，自己喺兩地都有舖，瀋陽間舖平均收益仲高過上海。
咁大筆錢塞入自己個袋，陳啟宗當堂嚇咗一跳，個心諗，唔係啩？瀋陽邊有上海咁好景，所以答話要研究一下。佢唔係得個講字，而係認真走去做調查，問嘅人都話瀋陽有景，佢即刻叫班員工出力做研究，一單生意，就係咁搞定。呢個故事，學到嘅係唔好忽視市場最前線嘅意見。