所謂君子遠庖廚！不過Feddy就話寧見其死，好怕見其生：「田雞煮餸真係超鮮味，不過生勾勾個樣真係好得人驚吓！」平時大家食田雞，不外乎煲粥放飯面，不過劉媽媽就諗到「青」炒新煮意；田雞肉嫩又鮮甜，胡亂加配菜，味道隨時喧賓奪主，偶然一試，發現用白菜仔呢種「青菜」炒，味道相夾仲帶出鮮味來呢！
記者︰劉昱蘭 攝影︰陳偉強
示範︰屯門讀者劉太
雙青炒 菜爽肉嫩
價錢︰$38/6人
需時︰15分鐘
材料︰白菜1斤、田雞11/2斤、薑2片
醃料︰豉油1湯匙、麻油1茶匙、胡椒粉少許
芡汁︰生粉2茶匙、豉油1茶匙、糖1/2茶匙
1.醃田雞
田雞先斬件，加醃料，快醃10分鐘左右。
2.炒白菜
醃田雞期間，先把白菜略炒至半熟備用。
3.炒田雞
落油爆薑片後炒田雞，埋芡後落白菜仔炒熟即可。
貼士︰田雞要即劏即製先夠鮮，買定雪住隔晚先煮就差啲喇！
喼汁雞塊 酸辣惹味
價錢︰$50/7人
需時︰20分鐘
材料︰鮮雞1隻、喼汁2湯匙、茄汁1湯匙、水適量
醃料︰生抽1湯匙、生粉11/2茶匙、糖/鹽各1/2茶匙、蒜茸2茶匙、薑茸/黑椒碎各1茶匙
1.斬雞
鮮雞洗淨後，放一邊吊亁水，然後將雞隻斬件。
2.醃雞
雞件加入醃料，同樣醃10分鐘左右，備用。
3.茄汁喼汁煮雞
落油爆雞，加入水及茄汁，焗5分鐘，上碟後加入喼汁即可。
貼士︰唔好貪快唔吊亁水，否則雞件會唔入味。怕酸者，落完茄汁可加糖調味。
冬瓜雲苓蟶子湯 入口鮮甜
價錢︰$38/5人
需時︰45分鐘
材料︰冬瓜2斤、雲苓2両、通草1/2両、陳皮1/4個、蟶子2斤、薑3片、水10碗、鹽少許
1.冬瓜切件
冬瓜、雲苓及通草洗淨，冬瓜連皮切件，陳皮切塊。
2.蟶子取肉
蟶子先去殼，然後取出肉，再用水清洗亁淨。
3.材料落鍋
所有材料放入高壓煲內，約滾45分鐘，加入鹽調味即可。
貼士︰蟶子記得用清水浸吓，等啲污物排晒出嚟先去煲湯喎！
爆笑！田雞叫青蛙
細路仔行街市，最怕就係見到田雞，腥哼哼、醜八怪，仲會反問你係咪食得㗎？劉媽媽都話Feddy當年都係其中一分子，「阿仔細個嗰時，好驚田雞㗎！不過最爆笑係佢指住田雞叫青蛙！（喺街市冇人叫田雞做青蛙㗎！）笑到魚檔阿姐合不攏嘴！」不過就係呢一句青蛙，就令劉太聯想到以青菜嫩炒，「大家都住喺同一塊田！都可算青梅竹馬長大，『青蛙』加青菜就叫佢做雙青炒啦！」
記者睇試煮，正是菜葉剛轉色、田雞就啱啱熟，兩者受火程度相當一致！講味道，白菜清甜，能帶出田雞的鮮美之餘，「氾濫」的菜汁，引出了濃濃的鮮肉味，這個菜汁用以淘飯，絕不亞於田雞肉的美味！
喼汁變「急」汁
搞笑事一浪接一浪，劉太有外國朋友嚟探佢嘅時候，就最鍾意煮拿手喼汁雞招呼朋友。有次有個識少少中文嘅朋友，攞住支喼汁問佢係唔係讀「急」汁，劉太就教佢讀喼汁喇，點知朋友讀咗「Gap」汁喎，同枱的仔仔囡囡率先笑到噴飯，我諗阿老外肯定好疑惑︰「What'swrongwithme？」