好耐都冇喺電視螢幕見到前有線新聞之花寶娃娃（張寶華），原來之前佢去咗英國牛津大學深造咗10個月，最近先至返香港。佢話之前急流勇退，係因為覺得做記者問唔到想問嘅嘢，好似變咗部錄音機，所以決定追求學問。
冇見一排，寶娃娃依然好fit，佢就自爆喺英國好食好住，搞到肥咗好多，返嚟香港要積極減肥，先至唔使變「肥娃娃」。浸完鹹水，佢即刻踩香港嘅教育制度唔掂，話香港學生嘅世界觀好狹窄，比中國大陸嘅學生更差。不過佢就點都唔肯講此行有冇艷遇。
寶娃娃近年向多線發展，仲轉行做才女，近日就出咗本書叫《生命中該有的》，呢句說話出自查良鏞。本書除咗有佢嘅留學雜憶，仲有人物訪問，好似李純恩同梁家傑等，收益全數撥捐救世軍。寶娃娃學成歸來，可能發現做慈善先係最重要。