關楚耀 模仿流川
「我諗有好多鍾意打籃球嘅人同我一樣，最愛嘅漫畫係井上雄彥嘅《男兒當入樽》。我當時喺加拿大讀書，每逢新書一出，必定第一時間買嚟睇，睇到波癮起就約班朋友去打波，我記得仲會模仿流川楓嘅打法，真係好正。𠵱家久唔久我都會拎番套書出嚟睇，而周邊嘅產品DVD、CD、精品、文具同game，我差唔多都有齊。」
推薦漫畫：《男兒當入樽》
作者：井上雄彥
陳奕迅 陳小姐索
「《老夫子》同《牛仔》我都好鍾意，但如果首選，咁就揀《老夫子》，我好鍾意老夫子、秦先生同大蕃薯，同埋陳小姐身材真係好好，着旗袍幾好睇。最記得個主筆當時話老夫子係講緊佢自己，而佢有大蕃薯嘅外形，至於秦先生就係佢一直想做到嘅image。我𠵱家都有保存啲漫畫書㗎，但唔會儲齊，偶爾會買本嚟睇。」
推薦漫畫：《老夫子》
作者：王澤
劉德華 鍾情怪醫
「我最鍾意嘅漫畫係《怪醫秦博士》，佢啲古仔營造到好緊張嘅效果，而且會教人道理，所以覺得好好睇。而且佢仲有條感情線，就係個女助手一直暗戀博士，個博士其實又知道㗎。同埋博士塊面好多疤痕，其實係因為佢之前整傷咗，佢本來有機會可以整番靚塊面，但佢冇咁做，因為佢想記得每一塊皮膚係邊個捐畀佢嘅，我覺得好有意思。」
推薦漫畫：《怪醫秦博士》
作者：手塚治虫
吳卓羲 難忘被嚇
「我最鍾意睇《漂流教室》，或者因為我鍾意睇恐怖嘅嘢，所以睇漫畫都揀呢類型嘅多。呢本漫畫有好多好驚心動魄嘅場面，而且有時角色嘅表情都好恐怖，睇完都令我毛管戙。
最記得呢本書初期話一班學生，其中一個女仔開始有污漕嘢上身，跟住佢個樣變晒，成個樣扭曲咗，印象好深刻。」
推薦漫畫：《漂流教室》
作者：楳圖一雄
採訪、攝影：駱華齡、馬建華、藍文浩
