政府上星期終於成功空降咗一位AO傅小慧去港台做副處長，工商及科技局局長王永平同埋常秘何宣威終於舒一口氣，因為煲呔有命，誰敢不從。
八方想搵何常秘問吓反應，點知遲來一步，何生已放大假，打聽之下，先知道何宣威同個仔去咗加拿大準備升讀大學。
如果冇記錯，何生係個多仔公，一共有三個乖仔，個個輪住讀書，所以佢選擇咗加拿大，話學費會平啲噃。
何宣威𠵱家係AO排名中都算好資深，要空降政務主任去港台，佢都估到一定有反響，咁傅小姐好打得，睇吓佢點拆招啦。
何常秘去咗放假，黃應士就馬不停蹄咁，四圍搜集意見，睇吓應該點處置港台，因為好快要交報告。𠵱家搞成咁，人人都贊成港台要脫離政府，問題係點樣令港台可以自負盈虧同埋唔會失控啫。
至於政府喉舌嘅角色，就等新聞處處長邱騰華去諗掂佢。