食魚生愈鮮愈正，但有時婆仔心理作祟，總會等到超市8、9點特價時段先去買；但橫掂係要等，咁應該等邊間超級市場，先有最多款式又最好味道呢？
睇過好多為食網友留言，佢哋都話惠康、百佳夠平又就腳；不過論最多人追捧者，係好多人估唔到嘅吉之島！好似在「Yahoo!智識+」網嘅felixlau0404就留言，佢話吉之島平得嚟，仲有好多較罕見嘅新鮮魚產，好似鰹魚、秋刀魚、鳥貝、粒貝、小魷魚等！另一特價精選係夜晚9點後嘅SOGO，都會有6折至8折，常見嘅有連殼甘蝦同海鰻，質素同價錢都唔錯，值得一食！
不過唯一望穿秋水都唔減者，係city'super同西田。一分錢一分貨，city'super最貴，因大部份魚生係日本飛機貨，幾夜去都無價講。西田就好興入罕見品種，好似日本飛魚咁，但價錢有時會去到差唔多$180，唔平㗎！但就好啱鍾意試新嘢嘅朋友。