懲教署儲蓄互助社噚晚喺會展搞咗個十五周年社慶暨懲教社教育基金助學晚會，剛喺7月先新官上任嘅懲教署署長郭亮明，身為呢個基金嘅名譽會長，梗係要擔大旗，周圍幫手招呼嘉賓。但係八方在場所見，只係得身為教育基金名譽顧問嘅鄭耀棠一個人撐場，本來話出席嘅另一位名譽顧問陳智思就人影都唔見。
可能得佢一個嘉賓，鄭耀棠特別高興，對住鏡頭勁笑，又不停搵人握手，非常風騷。其實懲教署唔單止喺監獄做懲教工作，仲好有社會責任，好似呢個教育基金，91年成立至今，資助咗唔少本地同內地嘅教育工作，又幫手重建內地瀕臨倒塌嘅學校，胡鴻烈、彭詢元同車淑梅都係名譽顧問，嚟緊10月仲有助學慈善行，幫助山區貧苦學生。