杜德偉近日因涉及桃色新聞，連帶過氣女友周汶錡都不斷俾記者追訪。早幾日杜德偉同傳媒講𠵱家仲掛住周汶錡，但係女方就公開請佢食檸檬，否決咗復合嘅可能性。
有打算結婚
噚日周汶錡、林祖輝、姚嘉妮同鄭融等人出席ImageCouple選舉，記者問如果杜德偉翻追周汶錡，佢會點？點知周汶錡就話：「唔好玩啦！唔會有呢個可能性，總之唔會。我覺得佢唔係咁嘅意思，記者話佢𠵱家唔拍拖掛住工作，唔拍拖唔代表掛住（我）嘅，專心工作啫！」不過見到50對準新人着上禮服影相，周汶錡都話好期待呢個日子，但暫時冇人向佢求婚。
至於拍拖七年嘅林祖輝同姚嘉妮，被記者追問婚期時話想結婚，只係未計劃幾時。喺台上林祖輝帶領眾新人宣讀誓詞，點知企喺隔籬嘅女友左擰右擰好唔專心，姚嘉妮仲 喺台上講：「佢（林祖輝）同鄭啓泰SMS用Honey稱呼㗎！」鄭啓泰即還口話：「你做大我做細囉！我唔介意㗎！」另外，許懷欣推出新碟《開竅》，仲送咗隻碟畀鄭融。
