無論你一生人同阿媽嗌過幾多次交，總有一次是因為一個ShoppingBag。
在你第一份工放工回家之後，你反轉了自己的房間，然後衝出廳問阿媽：「我個LV紙袋呢？」
阿媽話：「今朝載垃圾揼咗咯！」
「未問過我做乜揼我啲嘢喎？我keep住梗係有用㗎啦！」斬人如果有聲氣，就是這一種。
「你又冇講低，點知唧！你要用袋我搵個百佳袋畀你咪得囉，係咪要唧？」
親子關係，從此添上裂痕。
名牌第二代
初買名牌的年代，上述情況一定發生過，除非你的家境特別好。名牌用家的第二代，甚麼好嘢未見過？根本不會拿着個購物時附送的名牌紙袋當寶，事實上，拎慣Chanel袋的阿媽自己亦有分寸，不會魚翅當粉絲，錯手揼錯你的靚紙袋，更可能的情況是，完全沒有人當一回事，因為家裏一直以來都是用Joyce袋載垃圾的，毋須大驚小怪。
只有出身普通的人，死慳死抵開始用名牌的頭幾年，才會將那些印着大Logo的ShoppingBags隆而重之保留供奉，還得揀個重要場合才肯拿出來載冷衫或飯盒去街呢。
我就是那種「出身普通」的人，名店手抽袋，後來見慣了也沒有甚麼大不了，卻有點懷念初出道時一張花紙一條絲帶都keep住慢慢欣賞的日子呢。所謂「奢侈」，必須窮過才有意義的。
現袋的煩惱
寧俾人知莫俾人見，購物多年，到現在帶着個大Logo手抽穿街過市，還是有點難為情。所以近年盡量自備背囊，不用店舖提供的ShoppingBags。
還有兩大好處：一、環保；二、不用聽到同住的愛人或父母話：「嘩，又買嘢？」
黃偉文自我簡介
填詞人，其實最鍾意買嘢，最憎寫字，星期日盡可能唔寫字，去買嘢。
Textby黃偉文
