2003年4月6日，林夕填詞的《無間道》獲「香港電影金像獎最佳原創電影歌曲獎」，他在頒獎台上邀請有份主唱的劉德華一同上台。典禮完畢，二人消夜時撞見，暢談了一晚，說到填歌詞，他們有共同理念，天王與詞神看對眼，互相欣賞。
天王看林夕
「我未真正認識林夕前，覺得佢好神，有傳言話佢有個字庫，將七個唔同音嘅字分類，填歌時執藥咁執。識咗就知呢啲係謠傳同誤解，真正認識佢就知佢有喜怒哀樂，有市儈嘅一面，會講邊隻股票買得過，鍾意去睇樓盤，不過佢嘅世界真係好多庫，講乜佢都識，好似四、五個人夾埋做咗一個人咁，比普通人敏感囉。佢好似濟公，佢嘅行為見唔到神，但寫出嚟嘅嘢好神。我最鍾意佢填嘅詞係《費解》，係有道理咁去鬧一個人。」
詞神看劉華
「劉德華不嬲係我偶像，佢好大俠，令人尊敬。首先，我鍾意佢靚仔，吹咩？第二，佢好勤力，好有毅力，一路都有進步，連寫大字都係不斷進步，唔係冇嘢做先去做，佢咁忙都練到手字咁靚，又睇得多書，凡係睇好多書嘅人我都好敬重。佢係個有內涵嘅靚仔，對自己講嘅做嘅嘢都好負責任。我最鍾意佢填《如果有一天》，好幫到人開心啲，放低啲，我搵唔到有邊句歌詞可以改，真係無懈可擊。」