曾華倩舊年被揭同年輕九歲嘅無綫新紮小生馬國明擦出姊弟戀，但近月佢兩個就甚少見面，女方甚至唔留戀昔日同馬國明玩煮飯仔嘅九龍塘溫馨的家，帶埋7歲大囝囝浩賢低調搬竇，遷入九龍喇沙利道嘅舊樓。
華倩對暑假後升讀小二嘅囝囝學業一向緊張，早幾個月仲辭去港台主持工作，專心湊仔，自從搬竇後就更加深居簡出。上周日華倩41歲生日，由中午到凌晨12時點都未見過佢出現，可想而知佢幾深閨喇。
其實早排關仁都撞過華倩好幾次，但佢次次出街都冇預馬國明，就喺兩個禮拜前，華倩揸住部橙色MiniCooper，約老友杜貞貞去中環嘅滿漢居食晚飯，之後再去灣仔君悅酒店咖啡室傾偈；而喺佢生日前一晚，都帶過囝囝去旺角砵蘭街燈飾店配零件，買完嘢就即刻走。
面積近二千呎
華倩02年同前夫林肇基離婚之後，一直住喺有18年樓齡、價值600萬嘅九龍塘德麗閣1,300呎單位，當時仲傳由林肇基代支300萬首期㖭，但最近華倩遷進嘅喇沙利道三層式物業，接近半百樓齡，地方實用兼夠大，估計每層樓面積近2,000呎，兩母子實夠住有突，但始終欠咗位男主人囉，唔知馬小生又點諗呢？
