居於內地的八歲兒子，不幸遭遇交通意外，依靠綜援生活的祥叔被迫將本已微薄的生活費，用於治療兒子，弄致債台高築，現僅剩下數十元，即將面對斷糧危機。
遇交通意外左腳骨折
63歲的祥叔談吐溫文，在轉身也見困難的斗室，甫見記者，即連聲道謝。
他說：「以前都係多得你哋《蘋果日報》幫忙，先有善長捐部電視機同雪櫃畀我，提供基本娛樂同儲藏食物，本來都唔好意思再煩你哋，但𠵱家個袋得番幾十蚊，要捱到9月發綜援先有錢，實在支持唔到生活，先被迫再搵你哋幫手。」
祥叔說：「我個仔今年八歲，住響深圳，上年俾部電單車撞倒，左腳骨折，住咗醫院成個月，要問朋友左借右借，先籌到醫藥錢。出院之後，又要經常睇醫生。原本已經唔多嘅綜援金，除咗要分期還錢畀人之外，仲要畀額外嘅醫療費，先會搞到𠵱家咁唔掂，唔好話返去見個仔嘅交通費都冇，電話費我都欠交成個月！」
眼前三餐即將不繼的祥叔，原來曾任教師。祥叔說：「六十年代，我喺大陸廈門大學中文系畢業，跟住就分配咗去廣東一間中學做教師。直到1972年，我阿爸申請咗我落嚟香港團聚，由於香港唔承認我學歷，只能夠喺出版社做校對兼打雜。」
可是，隨着出版社於八十年代結業，祥叔便只能找得靠體力勞動的工作。他說：「之後就只能做啲粗重工夫，好似貨倉同保安員；三年前，我60歲嗰陣，公司又嫌我老，炒咗我，之後就再搵唔到嘢做，要攞綜援。」
有見祥叔經濟陷困，蘋果日報慈善基金即時撥款2,000元，助其應付基本生活需要。
捐款編號：C1846